سوق الانتقالات المحلي بدأ بسخونة كبيرة علطول يمكن حتى قبل ما الموسم القديم يخلص، في ظل رغبة الأهلي في تعويض خسارته لبطولتين دوري ورا بعض لأول مرة من 19 سنة، أما الزمالك فعايز يكمل في طريق البطولات ويلبي كل رغبات فيريرا عشان الهدف الأهم بالنسباله وهو بطولة إفريقيا.
الأهلي وبعد خسارة بطولتين دوري ورا بعض بقت مطالب كل الجماهير ورؤية مجلس الإدارة نفسه إن الفريق محتاج ثورة كبيرة في الميركاتو عشان يعلي كواليتي الفريق ويرجع تاني يسيطر على البطولات المحلية والقارية في السنين الجاية.
الزمالك بقا ورغم إنه حقق بطولة الدوري لكن فيريرا عارف كويس إن فريقه غير جاهز عشان يكمل بنفس القايمة دي، خصوصًا مع خسارة لعيبة زي أشرف بن شرقي وطارق حامد ومحمد أبو جبل ومحمد أوناجم في نص الموسم وكمان إيقاف القيد بقاله فترتين فالفريق مكنش قادر يضيف أي لعيبة لقايمته.
الزمالك بدأ يعلن عن صفقاته بشكل رسمي علطول خصوصًا إنها صفقات مجانية وانتقال حر والتركيز كان على تعزيز الفريق بصفقات أجنبية من الأول وفعلًا تعاقد الفريق مع زكريا الوردي، لاعب الرجاء المغربي السابق، وإبراهيما نداي، لاعب لوزيرن السويسري السابق، بجانب إعلان التعاقد مع أحمد أيمن منصور، بس دا هيكون لينا عليه كلام تاني.
الزمالك حاول إنه يستغل الخيارات المجانية المتاحة في السوق عشان يدعم بيها فريقه بدري بدري في الانتقالات خصوصًا إنه كواليتي كويس جدًا وبعد كدا يبص للخيارات بقا اللي هتحتاج تفاوض مع أنديتها.
أحمد أيمن منصور ظهر عائق كبير في صفقته إن اللاعب لم يؤدي الخدمة العسكرية لحد دلوقتي، وبسبب دا دخل نادي طلائع الجيش وطلب التعاقد معاه عشان يلعب سنتين مع الفريق كتأدية للخدمة العسكرية ودا اللي عطل الصفقة، لكن خلونا نشوف هتنتهي على ايه.
نروح بقا للغريم التاني، الأهلي واللي تركيزه واضح جدًا إنه في النواحي الهجومية أكتر وفعلًا يعتبر خلص صفقتين من سيراميكا كليوباترا وهما، شادي حسين ومصطفى سعد “ميسي” في صفقات تبادلية من خلال التخلص من بعض لعيبته الزائدين عن الحاجة وبدون دفع برضو أي فلوس.
كمان الأهلي في مفاوضات قوية مع إنبي عشان يتعاقد مع مصطفى شلبي، الجناح الأيسر، عشان يواصل دعم خط هجومه واللي ظهر أقل من المنتظر منه على مدار السنتين اللي فاتوا.
بجانب خط الهجوم، فالأهلي بيكثف مفاوضاته مع نادي فيوتشر عشان يحصل على خدمات محمد رضا “بوبو” عشان يحل أزمة موجودة في الأهلي بقاله أكتر من 3 مواسم وهي عدم وجود أي بديل لعمرو السولية ومعاناة الفريق جدًا في غيابه، لكن الصفقة لسة مش سهلة.
الأهلي بجانب كل دا شغال على ملف الأجانب لكن في سرية تامة، الأكيد إنه فيه صفقتين أجانب في الخط الهجومي “مهاجم وجناح” هيتم التعاقد معاهم لكن خلونا نشوف مين هم.
صراع مبكر علطول بين القطبين في الميركاتو بيؤكد إننا هنشوف أسبوعين ناريين في ظل التدعيمات والمنافسة بينهم على الصفقات، ومع وجود أندية قوية ماديًا زي بيراميدز وفيوتشر هتكون المنافسة أقوى وأقوى.
