الأهلي خسر الدوري المصري الموسم الحالي رسميًا، عشان يحقق رقم سلبي غايب من ١٩ سنة بخسارة اللقب موسمين متتاليين، وسط صدمة وسخط كبير من جماهيره.
لو جينا نشوف أسباب خسارة اللقب للأهلي هنلاقي إن كل عناصر المنظومة اخطأت وتسببت في الخسارة دي، والبداية من الإدارة اللي كررت سيناريو الموسم اللي فات بحذافيره واستنت نتيجة مختلفة.
الإدارة كررت خطأها بتأجيل الماتشات في نص الموسم لنهايته وتضغط الفريق بشكل جنوني ميستحملوش أي فريق بدنيًا، عشان يتكرر نفس السيناريو الموسم اللي فات ويقع الفريق مع ضغط الماتشات.
العامل التاني اللي كان ليه تأثير كبير في خسارة الدوري هو رحيل المدير الفني في وسط الموسم، حتى لو كان فيه عيوب كبيرة لكن توقيت رحيله كان مؤثر جدًا، وكان الأفضل لكل الأطراف إن المدير الفني الجنوب إفريقي يكمل لحد نهاية الموسم وبعد كدا يتم حسم مصيره، لكن ماذا لو هو اللي رفض يكمل؟
هنا هننتقل لفكرة اختيار بديل موسيماني كمان اللي كانت سبب كبير في خسارة الدوري بعد الاعتماد على مدرب مالوش أي خبرات سابقة تخليه يقدر يتعامل مع الموقف دا، وفعلا ظهر دا مع ضغط المنافسة الكبير، والاتجاه لمدير فني مالوش أي خبرات كبيرة ولا درب فريق كبير بينافس على البطولات وكل تجاربه مع فرق وسط أو في الدرجات الأدنى أصلا تخليه مش متعود خالص على ضغط المنافسات والضغط الجماهيري الكبير، وظهر فعلا قد إيه هو مش قادر يتعامل مع دا لما وصل للأهلي في عز المنافسة، عكس ما ظهر عليه فيريرا على سبيل المثال لما يملكه من خبرات طويلة.
طيب كان إيه الاختيار الأفضل لو مفيش مدير فني كبير وافق يمسك الفريق في التوقيت دا؟ اختيار سامي قمصان إنه يكمل الموسم مكنش هيكون اسوأ من اللي شافه الأهلي حاليًا لكنه كان محتاج شجاعة إنه يتاخد.
دا كله لا ينفي طبعًا المسؤولية عن لعيبة الأهلي اللي مقدروش يجددوا دوافعهم ويحاربوا على البطولة، ومع تراجع مستواهم الكبير دا مقدروش يساعدوا المدرب الجديد وساهموا في خسارة الدوري.
لعيبة الأهلي ظهروا في أوقات كتير ولحظات حاسمة من الموسم وكأنهم غير مكترثين خالص بفكرة المنافسة ومش فارق معاهم، ومفيش لحظة توصف دا ولا توضحه وضوح الشمس أكتر من حضور 4 لعيبة أساسيين ومنهم واحد من كباتن الفريق لفرح في إسكندرية قبل ماتش مصيري ومهم بيوم، في عز ما الأهلي مستواه متدهور جدًا والمنافسة على أشدها.
كل دي أسباب كانت كفيلة بخسارة الدوري والجميع يتحمل غلطها ومحدش برئ منها إطلاقًا، وكل الأطراف المعنية قصرت تقصير كبير أوي على مدار الدوري، ونقدر نقول إنهم عملوا كل حاجة غلط عشان الأهلي يخسر الدوري، فكان فيه تكاتف بس بدل ما يكون عشان المكسب كان عشان الخسارة، ودا كان نتيجته المنطقية.
