مصطفى محمد للماتش التاني على التوالي بينشر سحره في الملاعب الفرنسية وبيثبت نفسه من جديد مع نادي نانت في الجولة الخامسة من الدوري الفرنسي، عشان تبقى شهادة ميلاده في دوري جديد عليه.
مصطفى محمد الجولة الرابعة مع نانت أثار إعجاب مديره الفني بعد ما نزل قلب الماتش كله لصالح نانت، سجل هدف وصنع التاني بشكل مباشر والتالت بري أسيست منه عشان يكون كلمة السر في تحول الماتش كله.
المدير الفني طلع بعد الماتش وأشاد جدًا بمصطفى محمد وإنه هيكون لييه دور كبير مع نانت الموسم دا بفضل تحركاته المستمرة جدًا وقتاليته على كل كورة، وإنه بيثق في قدراته وهيعتمد عليه بشكل كامل.
مصطفى محمد كافئ مدرب نانت على تصريحاته دي للماتش التاني على التوالي، وأهداه نقطة من العدم في ماتش سترازبورج بعد ما سجل هدف التعادل في الدقيقة 86 بعد ما كان نانت متأخر في النتيجة بهدف نظيف.
الهدف دا بيزود الثقة في مصطفى محمد أكتر وأكتر وبيعلي سقف الطموحات عليه الموسم دا، وبيثبت نفسه أكتر وأكتر إنه يكون مهاجم نانت الأساسي باقي الموسم دا، ويديله ثقة عشان يكمل على نفس الأداء والمستوى دا.
مصطفى محمد على مدار الـ90 دقيقة سدد كورتين ناحية جول الخصم، قدر منهم يسجل جول التعادل في اللحظات الأخيرة ويخطف نقطة مهمة لنانت في الدوري الفرنسي.
المهاجم المصري الدولي مكتفاش بس بالتسديد وإحراز هدف التعادل لكنه كمان صنع فرصتين محققتين للتسجيل لزملاءه لكنهم ضيعوا الفرص دي، ودا بيدل على تأثيره الكبير في خط الهجوم.
تحركات مصطفى محمد كمان زي ما وصفها مدربه بتساعد كل عناصر خط الهجوم تلاقي المساحات وتصنع فرص قدام المرمى، عشان هو دائم التحرك وبيسحب مدافعي الخصم.
بداية ولا أروع لمصطفى محمد في مهمته الجديدة في الدوري الفرنسي، أهداف وقناعة من مديره الفني بأدواره في الفريق ككل عشان يثبت نفسه سريعًا في القوام الأساسي لفريقه وياخد ثقة كبيرة جدًا.
الماتش الجاي لمصطفى محمد هو الأصعب، قصاد وحش الدوري الفرنسي، باريس سان جيرمان بالتالي هيكون مهم يظهر فيها إمكانياته حتى لو مقدرش يسجل بس يظهر نفسه بشكل كبير قصاد الفريق الأكبر في فرنسا.
