في الساعات الأخيرة تحرك نادي نانت الفرنسي بالفعل عشان يتعاقد مع الجناح المصري الدولي أحمد سيد “زيزو” من نادي الزمالك، عشان يزامل المهاجم المصري الدولي التاني، مصطفى محمد في الفريق خلال الفترة الجاية.
تجربة مصطفى محمد رغم إنها لسة بتبدأ لكنها شجعت مسؤولين نانت على التحرك لضم لعيب مصري تاني، خصوصًا بعد ما أشاد المدير الفني للفريق بعقلية مصطفى محمد واجتهاده الكبير في التدريبات والماتشات، ودا اللي شجعهم يروحوا بعد كدا للاعب مصري جديد.
بحسب والد “زيزو” مسؤولون من نانت الفرنسي تواصلوا مع اللاعب وطلبوا التعاقد معاه في اليوم الأخير من الانتقالات الصيفية الحالية، واللي هتخلص في أوروبا بكرة، الأربعاء، اللاعب رحب بفكرة الاحتراف لكنه رفض فكرة التعاقد بالأسلوب دا.
نانت اقترح على أحمد سيد “زيزو” دفع قيمة الشرط الجزائي اللي موجودة في عقده مع نادي الزمالك، واللي قيمتها 2 مليون دولار والتعاقد معاه، لكن اللاعب رفض دا تمامًا وطلب من مسؤولي نانت إنهم يتواصلوا مع مسؤولي الزمالك وتقديم عرض للنادي لضمه من خلال العرض دا.
زيزو مرحب جدًا بفكرة الاحتراف وبيتمناها لكنه مش عايز “يخون” نادي الزمالك ويفعل الشرط الجزائي بدون موافقة النادي، وحابب يكون رحيله عن الفريق من خلال النادي وموافقته عشان كمان يحقق أكبر استفادة مادية من الرحيل لصالح الزمالك.
طيب لو الزمالك موافقش على بيع زيزو أو حدد طلبات بيع عالية في ظل إن باقي يوم واحد بس على نهاية الميركاتو؟ زيزو هيكمل في الزمالك ومش هيضغط على المسؤولين عشان يوافقوا على بيعه ولا هيروح للشرط الجزائي.
زيزو قدم موسم عظيم مع نادي الزمالك وكان المساهم الأول في تحقيق الفريق لبطولة الدوري المصري للموسم التاني على التوالي، بفضل أهدافه ومساهماته في الأهداف بالصناعة عشان يبقى الأكتر من الناحيتين، التسجيل والصناعة.
زيزو هو هداف الدوري المصري الموسم دا برصيد 19 جول والأكثر صناعة للأهداف في الدوري برصيد 13 جول، عشان يبقى مساهم في 32 هدفًا في الدوري بس ويلفت أنظار أكتر من نادي خارج مصر عشان يضمه.
الأرقام ما هي إلا مؤشر بس للي بيقدمه زيزو مع الزمالك على مدار الموسمين وإزاي بقا أهم لاعب في مصر، مع قدراته البدنية العالية اللي بتؤهله إنه يحترف في أكبر الدوريات الأوروبية ويقدر يتأقلم معاها بشكل سهل، ولكن هل مسؤولوا الزمالك هيفتحوله الباب؟ نتمنى عشان نكسب محمد صلاح جديد في أوروبا.
