جولة جديدة بدأت في صراع النادي الأهلي مع لاعبه السابق عبد الله السعيد بعد تصعيدات مسؤولي القلعة الحمراء ضد اللاعب، واستنجاد اللاعب بكل الهيئات الدولية لمساعدته عشان يهرب من العقوبة اللي وقعت عليه بسبب ناديه السابق.
الحكاية بدايتها كان لما عبد الله السعيد انتقل لأهلي جدة في صيف عام 2018 بعد أزمة توقيعه لنادي الزمالك ورفض مسؤولو الأهلي وقتها إن اللاعب يكمل وتم بيعه بالفعل لنادي سعودي عشان تتحل الأزمة دي.
الأهلي في عقد بيع عبد الله السعيد مع أهلي جدة حط بند مالي إنه في حال بيع عبد الله السعيد لأي نادي مصري خلال الـ3 سنين التاليين هيكون نادي أهلي جدة ملزم إنه يدفع للأهلي القاهري 3 مليون دولار كغرامة على دا.
موسم واحد بس وعبد الله السعيد فسخ عقده مع أهلي جدة عشان ينتقل إلى بيراميدز بعد كدا، وهنا الأهلي بدأ يتحرك قانونيًا علطول عشان يحفظ حقوقه ويطالب بالتعويض من أهلي جدة، وبالفعل حصل على أحكام ضد عبد الله السعيد عشان يدفع الغرامة المالية دي للأهلي خصوصًا وإنه فسخ عقده بالتالي أهلي جدة محصلش على أي قيمة مالية مقابل بيعه.
الأهلي واصل تصعيده ضد عبد الله السعيد لحد ما خد حكم بالحجز على ممتلكات اللاعب فعلًا وأرصدته في البنك ومنعه من التصرف في أي حاجة فيهم، وهنا بدأ عبد الله السعيد يتحرك في الناحية المضادة لوقف الحكم دا.
صباح الجمعة، تفاجئ الكل إن لجنة اللاعبين المحترفين الدولية ” “فيفبرو” طلعت بيان رسمي على موقعها بتطالب الأهلي بوقف عمليات “الترهيب” زي ما وصفقتها والمضايقات اللي بتقوم بيها ضد عبد الله السعيد.
المدير القانوني في لجنة اللاعبين المحترفين وصف اللي بيقوم بيه الأهلي بإنه “جعل حياة اللاعب كابوسًا” ودا بس عشان االلاعب اختار إنه يلعب لأحد المنافسين في القاهرة، وبالتالي طالب مسؤولي الأهلي إنهم يوقفوا عمليات الترهيب دي ويتركوا اللاعب وشأنه.
كمان اللجنة قالت إن البند اللي الأهلي حطه في عقد عبد الله السعيد مع أهلي جدة غير قانونًا ومُفزع للاعب، لأنه بيقيد حرية اللاعب وبيخليه مش قادر يحدد مستقبله بالشكل المناسب لييه ودا مش قانوني في لوائح الفيفا.
بيان أشعل النار مرة تانية في قضية الأهلي وعبد الله السعيد واللي كانت متغطية بشوية رماد لكنها مطفتش، وبيؤكد إننا قدام جولة جديدة في الصراع القانوني بين الأهلي وعبد الله السعيد في الفترة الجاية.
صراع مستمر بقاله 4 سنين لحد دلوقتي وعلى ما يبدو هيفضل مكمل معانا فترة أطول حتى في حال قرر عبد الله السعيد الاعتزال شكل الأهلي مش هيسيبه.
