ماتشات الجولة التانية من الدوري الأوروبي شهدت مشاركة للثنائي المصري محمود حسن “تريزيجيه” ومصطفى محمد، واللي كان فيها تألق كبير لنجم الأهلي السابق بعد ما سجل جول وصنع جول تاني.
الجولة اللي فاتت من الدوري الأوروبي كانت ليلة تألق مصطفى محمد مع نانت الفرنسي بعد ما سجل جول صنع جول تاني في ماتش أولومبياكوس، عشان ياخد منه تريزيجيه شعلة التألق في الجولة التانية ضد كرفينا واللي خلص بجولين مقابل جول وحيد.
خلونا نبدأ مع محمود حسن “تريزيجيه” اللي شارك مع طرابزون سبور ضد كرفينا وقدر يكون نجم الماتش بلا منازع، تريزيجيه صنع الجول الأول اللي سجله نجم نابولي السابق، هامسيك قبل ما يكلل تألقه بجول تاني سجله بنفسه بطريقة جميلة جدًا.
تريزيجيه على مدار الـ90 دقيقة قدر يشوط 3 تسديدات كلهم على المرمى وتسديدة واحدة كانت خارج المرمى خالص قدر يسجل منهم جول، كمان صنع الجول الأول ومرر تمريرتين حاسمتين لزمايله لكن متمش استغلالهم.
تريزيجيه قدر يكون نجم فريقه الأول والأكثر حسمًا عشان ياخد التقييم الأعلى في الشركات العالمية بتقييم وصل حوالي 8.2/10، وكان هو الحاسم بانطلاقاته دايمًا وسرعته وكمان كان حاسم في اللمسة الأخيرة سواء كان بالتسديد والتسجيل أو الصناعة.
الناحية التانية مصطفى محمد مكنش في أفضل أيامه إنهاردة سواء هو أو فريقه نانت، بعد ما خسر 3 أهداف دون مقابل في الجولة التانية، ومكنش فيه وجود حقيقي للمهاجم المصري على مدار الماتش.
مصطفى محمد سدد كورتين، واحدة فيهم على الجول والتانية خارج المرمى خالص، ولكنه لم يصنع أي فرصة محققة للتسجيل للزملاء طول الماتش، بالتالي حضوره إنهاردة مكنش قوي وملحوظ زي الجولة الأولى.
لما نيجي نبص لاحتفاظه بالكورة، مصطفى محمد فقد الكورة 12 مرة وهو أكتر لعيب في الملعب كله وكمان نسبة دقة تمريراته كانت بس 53% ودا رقم قليل جدًا، ويدل إن النجم المصري مكنش إنهاردة في أفضل مستوياته.
وكدا على مدار جولتين، كل جولة تألق فيها لاعب مصر، الجولة الأولى تألق مصطفى محمد والجولة التانية تألق محمود حسن “تريزيجيه”، عشان تفضل البصمات المصرية مستمرة في البطولات الأوروبية للجولة التانية على التوالي، ويفضلوا يقدموا نفسهم في الملاعب الأوروبية بنجاح.
