لاعبين كتير بيظهر أسمهم بشكل قوى جدًا فى بطولات كأس العالم، وكل لاعب بيلمع نجمه فى المونديال، ديما بيكون محط أنظار العالم كله والكل بيسأل مين ده وحكايته إيه….
“ريتشارليسون دى أندرادي” اللى فى يوم وليلة بقى مهاجم المنتخب البرازيلى الأول، هو بطل الحكاية فى النسخة 22 من بطولة كأس العالم فى قطر…
سمعنا كتير عن قصص لاعبين عانوا فى صغر سنهم قبل ما يتحولو بعد كده لنجوم كبار جدًا فى عالم كرة القدم، وشفنا كتير لاعبين بيعانوا حتى فى الملاعب لحد ما تيجى بطولة معينة ونجمهم يلمع فيها…
بدأ ريتشارليسون حياته فى أسرة فقيرة فى البرازيل، ووالده كان بيشتغل فى أعمال البناء، أما والدته كانت بياعة فى أحد المحلات وعاملة نظافة، وكان ليه 5 أخوات…
نشأته كانت فى حى نوفا فينيسا فى البرازيل، واللى معروف جدًا بإنه موطن عصابات كتير، وديما مليان بالحروب والمشاكل بين العصابات دى وأعدائهم من كل حتة…
ريتشارليسون حكى إنه كان بيحب الكورة من صغره، وموهبته كان واضحة من بدرى زى أطفال برازيليين كتير جدًا، لكنه مر بصدمة كبيرة وهو صغير…
بيقول إن واحد من رجال العصابات دول وجه مسدس لوشه وهو طفل صغير، واتهمه بإنه سرق مخدراته وخباها فى الكرة اللى بيلعب بيها، وما سابهوش إلا لما أخد من الكورة دى وقطعها واتأكد إنها فاضية…
من سن 5 سنين كان بيلعب فى الشوارع والساحات، لحد ما حصلت المعجزة ولفت أنظار رجل أعمال اسمه ريناتو فيلاسكو، واللى ضمه سنة 2013 لنادى ريالنورويست المحلى…
فى أقل من 3 سنين كان ريتشارليسون بيلعب فى الفريق الأول، ولعب للدرجة الأولى لأول مرة بقميص فلومينيزى فى 2016، وأداء موسم واحد بس كان كفيل يخليه هدف كل أندية أوروبا…
انتقل ريتشارليسون للدورى الإنجليزى، وده من بوابة نادى واتفورد، وبعد أداء كبير جدًا ومهارات وسرعات وبرضه لمدة موسم واحد، ضمه نادى إيفرتون مباشرة بـ40 مليون يورو، ووقتها كان أعلى رقم فى تاريخ النادى…
فضل فى صفوف إيفرتون لمدة 4 مواسم، قبل ما ينضم مطلع الموسم الحالى لنادى توتنهام، واللى مضى فيه عقد لحد سنة 2027، وقدم مستويات جيدة جدًا من بداية الموسم…
قبل شهور قليلة محدش كان يتخيل إنه هيكون مهاجم البرازيل الأساسى، كان فيه أسماء كتير سابقاه زى فيرمينو لاعب ليفربول، وجابراييل خيسوس مهاجم أرسنال، لكن فجأة فيرمينو خرج من القايمة خالص، وخيسوس هو البديل، وريتشارليسون الشاب هو المهاجم الأساسى…
ريتشارليسون الحقيقة ما يخبش ظن تيتى المدير الفنى للمنتخب البرازيلى، ومن أول مباراة فى المونديال قد أداء رائع جدًا وسجل ثنائية فى شباك صربيا، من هدف خيالى بمقصية على طريقية السيليساو…
ريتشارليسون زى لاعبين كتير، بعد ما عاشوا حياة صعبة جدًا قبل كرة القدم، قرروا يدوها كل حاجة، يا ترى هيقدر يقود البرازيلى للتتويج جديد فى المونديال؟.. وهل ممكن يكرى تجربة الظاهرة رونالدو؟؟
