الإصابة قد تبعد حكيمي عن المنتخب المغربي في كأس العالم وتقارير لعب مباراة كرواتيا مصابًا
الإصابات ديما هى العدو الأول للاعبى كرة القدم، وخصوصًا فى الأوقات الخاصة بالبطولات الكبيرة واللى بتتلعب فى فترات محددة وقصيرة زى كأس العالم…
النسخة دى تحديدًا من كأس العالم، كان فيها عدد غير عادى من الإصابات، سواء اللى ضربت اللاعبين قبل انطلاق البطولة وحرمتهم من المشاركة من البداية، أو الإصابات اللى اتسببت فى حرمان لاعبين من استكمال مشوارهم اللى بدأوه مع فرقهم…
لاعبين كتير جدًا غابوا عن نهائيات كأس العالم 2022 بسبب الإصابات اللى اتعرضوا ليها قبل أيام قليلة من البطولة الغالية، ويمكن أبرزهم السنغالى ساديو مانى…
منتخب فرنسا يعتبر أكتر منتخب بيعانى من غيابات نتيجة الإصابات، لأنه بيفقد أكتر من 5 لاعبين وهما بوجبا، وكانتى، وكيمبيمبى، ومينيان، وفاران، ونكونكو، وكريم بنزيما…
إصابة كريم بنزيما كانت صادمة جدًا لإنها حصلت وهو فى معسكر المنتخب الفرنسى، هو ونكونكو والاتنين خرجوا من المعسكر بعد ما كانوا قاب قوسين أو أدنى من المشاركة فى البطولة…
عضو جديد بينضم قائمة ضحايا لعنة إصابات المونديال، وهو المغربى أشرف حكيمى نجم باريس سان جيرمان الفرنسى…
حكيمى شارك فى فوز منتخب المغرب المهم جدًا قدام منتخب بلجيكا فى المباراة اللى فاتت، واللى كانت فى الجولة التانية من مجموعات كأس العالم…
خرج أشرف حكيمى فى الدقيقة 65 فى ماتش المغرب وبلجيكا وكان واضح إنه بيعانى من إصابة، لكن المفاجأة كانت فى التقرير اللى كشفت عن تفاصيل الإصابة دى…
التقارير أكدت إن حكيمى ما اتعرضش لإصابة فى ماتش بلجيكا، بالعكس هو كان مصاب من أول البطولة، وبيلعب وهو بيعانى من إصابة…
حكيمى إصابته كانت بسيطة فى البداية، قبل ما بدأ يحس بالآلام بتزيد شوية بشوية، وفى مباراة بلجيكا مبقاش قادر يتحمل الوجع، وخاف إن الإصابة تزيد بشكل خطير وتحرمه من باقى المونديال…
إصابة حكيمى لحد دلوقتى بنسبة كبيرة هتخليه يغيب عن الماتش الحاسم قدام منتخب كندا فى آخر مباراة للمغرب فى دور المجموعات من كأس العالم…
التقارير قالت كمان إن المنتخب المغربى عنده مشكلة كبيرة، وهى إن فى لاعب تانى برضه بيلعب وهو متحامل على نفسه وبيعانى من إصابة…
رومان سايس قلب دفاع أسود أطلس هو كمان بيعانى من إصابة، وزى أشرف حكيمى تحامل على نفسه لكنه برضه حاسس إن الإصابة بتزيد…
وليد الركراكى مدرب المنتخب المغربى فى ورطة كبيرة، لإن الفوز فى ماتش كندا ملهوش بديل علشان يريحوا نفسهم ويصعدوا بسهولة، وفى نفس الوقت عنده اتنين من أهم العناص بيعانو من إصابة خطيرة، نتمنى لعنة الإصابات تبعد عن منتخباتنا العربية ويكون الثنائى المهم موجودين فى الماتش الحاسم قدام كندا.
