أفشة خارج الأهلي.. ده العنوان اللي حطته كتير من المواقع الصحفية مع انتشار أخبار عن العرض من نادي أوروبي شهير للتعاقد مع لاعب الأهلي الفترة الجاية.
الغريب في الأمر أن النادي الأهلي وافق بالفعل على العرض وعلى استعداد لرحيل اللاعب.. إيه حكاية العرض الأوروبي؟ وإيه الشرط الوحيد اللي يمنع إتمام الصفقة؟.. تفاصيل كتيرة نكشفها في الفيديو ده.
مفيش كلام بين جمهور الأهلي في الوقت الحالي إلا عن العرض الأوروبي اللي جاي لمحمد مجدي أفشة لاعب الفريق وهيخليه يرحل عن النادي الأهلي الفترة الجاية.
طيب إيه هو العرض ده؟
الإعلامي محمد شبانة كشف عن تفاصيل العرض الأوروبي لمحمد مجدي أفشة لاعب النادي الأهلي واللي جاله بعد تألقه وانضمامه للمنتخب الوطني الفترة اللي فاتت.
شبانة قال خلال حديثه في برنامجه «بوكس تو بوكس»، إنه فيه عرض رسمي جاي لأفشة من نادي سيلتك الاسكتلندي الشهير في أوروبا، عشان ينضم اللاعب للفريق ويلعب معاهم في دوري أبطال أوروبا الفترة الجاية.
العرض ده اللي خلي وكيل أفشة يتواصل مع سيد عبدالحفيظ مدير الكرة بالنادي الأهلي ويعرف مدى إمكانية التخلي عن اللاعب الفترة الجاية وهل ممكن يحترف في أوروبا والأهلي يسيبه.. لكن سيد عبدالحفيظ رد عليه وقاله إنه هيتم الحديث في هذا الأمر في وقته لما يوصل العرض الرسمي.. في الوقت اللي الكل بيقول إن الأهلي صعب يسيب أي حد في يناير حتى الآن خاصة من القوام الأساسي للفريق.
الإعلامي محمد شبانة قال إن محمد مجدي أفشة يعتبر من الأعمدة الرئيسية في النادي واللي كمان بيتمتع بجماهيرية كبيرة من وقت ما نجح في مساعدة القلعة الحمراء بتحقيق آخر بطولتين في أفريقيا
لكن خلال الساعات اللي فاتت كشف مصدر مسئول داخل القلعة الحمراء عن تفاصيل جديدة عن العرض الاسكتلندي لضم محمد أفشة في الميركاتو الشتوي في يناير المقبل، وأن وكيل اللاعب عقد جلسة تانية مع سيد عبدالحفيظ، مدير الكرة بالأهلي، عشان يحسم موقف الأهلي وكولر، المدير الفني، من رحيل اللاعب او لاء.
المصدر أكد أن سيد عبدالحفيظ اللي أكد أنهم مصريين على استمرار اللاعب مع الفريق خاصة أنه من القوام الأساسي وصعب يسيبه في يناير اللي جاي.. لكن في نفس الوقت هما مش هيمنعوا اللاعب من الاحتراف او انه يشوف مستقبله لكن لو عايز يمشي من النادي هيكون أخر الموسم مش في يناير.
سيد عبدالحفيظ أكد لوكيل أفشة أن مجلس الإدارة معندهوش مانع من مناقشة عرض البيع للاعب خاصة أنه هيروح لفريق كبير في أوروبا وهيشارك في دوري الأبطال واللي ممكن يكون انطلاقة له بعد كده.. بس بشرط أنه يكون جاي بشكل رسمي ومش يكون عرض من شركات تسويق.
المصدر أكد أن مجلس إدارة النادي الأهلي وافق على بيع اللاعب بالفعل في نهاية الموسم لكنه وضع شرط وحيد لإتمام الصفقة وهو أن يكون العرض المالي للشراء قوي ومغري وأن الأهلي لو وصل عرض له بـ4 ولا 5 مليون هيسيب اللاعب.
