ألف تحليل وتحليل رياضي ممكن العقل يستوعبه ويفهمه. وكل عشاق الرياضة فهمين كويس أن تحليل المونديال والمباريات بيكون بعد المباريات وبعد إعلان النتائج الرسمي. لكن عشان تحليل يطلع على أنه يقيني ويحدد أسماء أبطال المواجهات النهائي ويوزع المراكز على الفرق والمنتخبات الكبيرة قبل متبدأ هنا فيه حاجة مش مظبوطة. والخوف دلوقتي أنها ممكن تأثر على تنظيم المونديال كله رغم المصاريف اللي اتصرفت عليه.
رغم أن الكلام عن الفايز النهائي في كاس العالم وترتيب المراكز قبل نهاية المونديال ممكن يقلب الدنيا ويبوظ تنظيم المونديال عيني عينك لأن معناه أن فيه حاجة ممكن تكون مش قانونية أو اتفاقيات سرية. لكن طلع لينا تحليل من تطبيق التيك توك بيحدد مين هيصعد للنهائي ومين هيتراجع.
لأ وكمان التحليل اللي عمله واحد من المستخدمين ده بدأ يبني النتائج اللي بتتروج يوميا على التيك توك على مقطع فيديو بيقول أنه من مباراة نهائي كأس العالم اللي هيا لسه محصلتش .. يا مثبت العقل يا رب .. إيه اللي بيحصل.
طالع لينا المحلل إياه بيقول على التيك توك أنه مسااااااااافر عبر الزمن. بيأكد بأدلته أن معاه اسم الفايز بالبطولة.. لأ لحد هنا وحدة وحدة عشان مخنا ميشتش.. إيه اللي حصل؟
اللي حصل أن الأخ مستخدم التيك توك قال إيه جاي من بكرة!!! تقصد من امبارح يعني؟؟؟ .. لأ جاي من بكرة هوه اللي بيأكد وبيأكد كمان أنه شاف نهائي كأس العالم قبل ميبدأ.. لأ ده كمان قدم دليل على كلامه بفيديو بيوثق فوز إنجلترا في مونديال قطر في المواجهة النهائية قدام البرتغال.
ثواني يا سيادة المحلل.. جالك منين الفيديو وعرفت إزاي وتسريبات إيه اللي بتقولها ممكن تقلب الدنيا؟؟ برده سيادة المحلل قال إن كلامه واضح في جملتين ” إنجلترا هزمت البرتغال حالا في نهائي المونديال”
الغريب كمان أن المحلل ده أظهر نتائج بتقول أن هاري كين في الفيديو إياه اللي نشره عن نهائي كأس العالم، سجل في الشوط الأول هدف وجه نجم تشيلسي ماسون ماونت في الدقيقية 84 بضربة مباغتة حقق هدف الفوز.
الصدمة من التحليل المنتشر ده، أنه حط نتيجة 2 صفر لصالح إنجلترا وده اللي أظهر المشجعين في حالة فرح هستيري رافعين أعلام بلدهم.. أما النجم كريستانو رونالدو فضل يبعد بعد النتيجة مكسور الخاطر يا ولداه من الهزيمة وبدأ مدرب البرتغال فرناندو سانتوس يشوح بإيديه لأنه مش طايق الموقف الصعب اللي اتحط فيه.
طبعا الفرحة انتشرت في بريطانيا كلها بالفوز وبدأ نهر التايمز ينور بعروض الألعاب النارية. . لحد هنا والحلم قصدي التحليل انتهى.
لكن اللي منتهاش عند جمهور المونديال فهمهم الكويس أن الافتكاسات دي مش أول مرة وياما طلعت تحليلات فشنك زيها متخليناش نقلق.. لكن جه فوز إنجلترا الفعلي في المواجهة بينها وبين ويلز بـ 3 أهداف يأكد أن منتخب إنجلترا فعلا جامد في مواجهات المونديال.
ورغم أن فوز إنجلترا الحقيقي كان تفوق ودعم لتوقعات تقدم فريقها إلا أنه عمل مشاكل بعد غضب مشجعين ويلز اللي أصلا عاوزين ينفصلوا عن بريطانيا. وقالوا أنهم زعلانين من تصرف الأمير ويليام اللي المفروض يكون محايد لكنه نسي أنه رئيس الاتحاد الإنجليزي قبل المونديال ودععم الفريق الإنجليزي.
انتهى حسم انجترا المتوقع في كأس العالم وفوزها الحقيقي على الأرض قدام ويلز. لكن لسه عجلة التحليلات شغالة.. لما نشوف مخبية لمونديال قطر إيه تاني.
