المغرب كتب التاريخ في النسخة دي من كأس العالم، بعد الوصول للدور نص النهائي من بطولة كأس العالم وكل الإنجازات التاريخية اللي حققها بالرحلة دي…
منتخب المغرب في فترات كتير من التاريخ كان عليه طموحات كبيرة، خصوصًا في مونديال 1998 بالجيل الدهبي اللي كان بيملكه، لكن مؤامرة ضيعت طموح الجيل ده وحرمتهم من إنجاز كان ممكن يحققوه…
المنتخب المغربي حقق إنجازات تاريخية بالجملة في النسخة الحالية من بطولة كأس العالم، وبدأ رحلته بالصعود من دور المجموعات في صدارة مجموعة صعبة جدًا…
مجموعة المغرب ضمت بلجيكا وكندا، وكرواتيا، لكن أسود الأطلسي قدروا يوصلو لربع النهائي كأول منتخب عربي يحقق الإنجاز ده، قبل ما يوصلوا لنص النهائي كأول منتخب عربي وإفريقي يوصل للمرحلة دي في المونديال…
المغرب صحيح بتملك مجموعة مميزة جدًا وقوية جدًا من اللاعبين في النسخة دي من كأس العالم، وخلونا نطمع في إنهم يقدروا يوصلوا لأبعد من كده في البطولة، لكنهم في يوم من الأيام كان معاهم تشكيل كله نجوم وكان ممكن يحققوا الإنجاز ده من 24 سنة…
في كأس العالم نسخة 1998 في فرنسا، المنتخب المغربي قدم أداء رائع جدًا، خصوصًا مع الكتيبة اللي كان بيملكها من اللاعيبة زى مصطفى حاجي، ويوسف شيبو، والقائد نور الدين نايبت…
القرعة وقعت المغرب في مجموعة بتضم النرويج وأسكتلندا والبرازيل بكل نجومها، لكنهم في أول ماتش قدروا يحققوا التعادل بهدفين لكل فريق قدام منتخب النرويج، والجنب التاني البرازيل فازت على أسكتلندا 2-1…
في الجولة التانية المغرب خسرت قدام البرازيل بثلاثية نظيفة، لكن الناحية التانية النرويج وأسكتلندا اتعادلوا 1-1، بكده البرازيل صعدت رسمي والمكان التاني متاح لأي حد من المنتخبات التلاتة…
ترتيب المجموعة وقتها كان 6 نقط للبرازيل في الصدارة، ونقطتين للنرويج، ونقطة للمغرب، وزيها لأسكتلندا، بس بحسابات الكورة وقوة الفرق، المغرب كانت الأقرب للدور التاني…
المغرب كانت هتلاعب أسكتلندا اللي هي أضعف منتخبات المجموعة، والنرويج منافس أسود الأطلسي هيلعبوا ضد البرازيل الجبارة بكل نجومها والطبيعي إنهم يخسروا والمغرب تكسب وتتأهل…
المغرب قام بدوره وفاز على أسكتلندا بثلاثية نظيفة فى ماتش من طرف واحد حرفيًا، لكن الناحية التانية كان في مؤامرة الناحية التانية علشان يخرج المغاربة من البطولة…
منتخب البرازيل كان متقدم على النرويج بهدف نظيف، لكن في العشر دقايق الأخيرة فجأة البرازيل فتح دفاعاته بشكل غريب جدًا، وسجل النرويج هدف التعادل، وبعدها الهدف التاني من ضربة جزاء، وحققوا الانتصار على البرازيل علشان يصعدوا هما بفرق نقطة واحدة بس عن المغرب…
اللي حصل في المباراة دي الإعلام اعتبره واحدة من أغرب المؤامرات، خصوصًا إن المنتخب البرازيلي منتخب من أمريكا الجنوبية، والنرويج من أوروبا، غير إن البرازيل كانت بتملك عدد غير عادي من النجوم…
القدر انتقم للمغاربة في نفس النسخة بخسارة البرازيل الماتش النهائي قدام فرنسا، أما النرويج فخرجت من الدور التاني على طول قدام إيطاليا، والنهاردة المغاربة بيحققوا اللي فشل فيه جيلهم الذهبي بعد 24 سنة…
