عين وصابت الوسط الكروى فى مصر، بقالنا فترة كبيرة،كل اللى بنسمعه ونشوفه أزمات،مع لاعبين بقى ،مع لاعبين وإدارة الأندية ،مع إدارة النادى نفسه.وقليل لما تلاقى أخبار عن إنجاز ولا مباراة ،حتى المباراة يا أخى بتحصل فيها خلافات وخناقات.
وفى أخبارعن أزمات مالية كبيرة بيمر نادى بيراميدز ما تيجوا نعرف الحكاية إيه،وده هيأثر على وجود اللاعيبة ولا لا؟ وهل دة ممكن يكون سبب عبد الله السعيد فى الرحيل عن بيراميدز؟يلا نعرف التفاصيل..
محدش يقدر ينكر الأزمة الإقتصادية العالمية إنها مأثرة على كل حاجة فى حياتنا،والكل فاكر إن لاعيبة الكورة ملهومش علاقة وبيقولوا عليهم دول فى مية البطيخ،ولإن الصورة اللى متاخدة عن لاعبين الكورة غير الواقع اللى بيعشوه فده يخلينا نعرف هو إيه الواقع ده؟
الساعات اللى فاتت مفيش أخبار غير عن عبد الله السعيد وقصة تهديده لبيراميدز بالرحيل على النادى خاصة بعد فرض العقوبة عليه بغرامة 250 ألف جنيه.
بمعنى أصح تهديد من السعيد وبيخير إدارة بيراميدز يا كده يا كده، يا أنا يا الغرامة ،ومسك بيراميدز من اليد اللى بتوجعهم ،اللى هو لو عايزنى أكمل معاكوا فى النادى مش هدفع الغرامة وأكمل وننسى اللى فات ونفتح صفحة جديدة،يا إما هدفع الغرامة تمام بس هرحل عن النادى.
وده اللى أكده شبانة في تصريحات تليفزيونية، إن عبد الله السعيد اشترط على مسئولي ناديه رفع عقوبة الـ250 ألف جنيه اللى سبق وفرضها عليه مقابل استمراره في الموسم ده للنادى.
قال كمان إن السعيد هدد بشكل واضح بفسخ التعاقد ،وده فى حالة استمرار العقوبة المالية عليه وطلب من الإدارة رفع العقوبة.
والكل بيسأل هل الغرامة بسبب تصرف السعيد الأخيرة مع زميله مصطفى فتحى فى مباراة المقاولين؟ ولا بسبب تصرفه لما ساب الملعب ومشى لما جونياس إستبدله بين الشوطين.
السعيد وكتير من زمايله فى الفريق مخادوش مستحقاتهم المالية بقالهم فترة كبيرة ،حتى جونياس بعد ما كان بيقبض بالدولار هيقبض بالجنيه المصرى،بسبب الازمة المالية اللى بيراميدز بيمر بها.
الجمهور قال لما تكون عقوبة السعيد إستبعاد عن مباراة الزمالك ماشى مش مهم، لكن غرامة ب250 ألف جنيه وهو أصلا مش بياخد مستحقاته من النادى؟ يبقى أكيد ده طبعا سبب الأزمة،وسبب رحيله عن النادى.
عبد الله السعيد علشان عارف إن وجوده فارق فى بيراميدز إتشرط بالشروط دى،وعارف كمان إن وجوده فى مباراة الزمالك الاخيرة اللى مشاركش فيها كان هيفرق أكتر كمان.
لكن جونياس قال إن عبد الله السعيد قائد فريقه لاعب هام لكن غيابه لم يكن سببا للهزيمة ضد الزمالك
الإعلامى هانى حتحوت قال من خلال برنامجه الماتش إن بعد خناقة السعيد مع المدير الرياضى ببيراميدز هانى سعيد ، قرر خصم الغرامة من راتب السعيد،وتم إبلاغ عبد الله السعيد على جروب اللاعبين ،فكان رد فعل السعيد مفاجأة إنه خرج من الجروب على طول،وقرر التنازل عن شارة قيادة بيراميدز .
طبعا إستبعاده أو خلافه مع مصطفى فتحى كان زى ما بيقولوا كده القشة اللى قصمت ظهر البعير،أصل الخناقات بن اللاعيبة مفيش أكتر منها يعنى.
السعيد معتقد إن مجرد ما يرحل من بيراميدز ،ألف نادى يتمناه،خاصة بعد إنتشار الأخبار الفترة الأخيرة نادي الزمالك يفتح باب مفاوضات مع عبد الله السعيد علشان يضمه خلال فترة الانتقالات الشتوية اللي جاية في شهر يناير,لكن الإعلامى هانى حتحوت أكد عكس ده تماما وإن الزمالك مش بيفكر فى ضم السعيد خالص الفترة دى.
هل تعتقدوا إن السعيد فعلا ممكن يرحل عن بيراميدز،ولا مجرد تهديد للنادى مش أكتر؟ وهل ممكن يدفع الربع مليون جنية الغرامة؟ ولا مصيره هيكون إيه؟وهل بعد رفض الزمالك ضمه ممكن يلعب فى نادى إيه؟ هنعرف كل التفاصيل دى الأيام الجاية تابعونا.
