على مدار الفترة اللي فاتت وتحديدًا من بعد ماتش نهائي دورى أبطال إفريقيا بين الأهلي والزمالك، ومحمد مجدي قفشة صانع ألعاب النادى الأهلي بيمر بمرحلة مش هي الأفضل في مسيرته…
خلال السنتين اللي فاتوا ومع كل فترة انتقالات بقى اسم قفشة الأول في قايمة المحتمل رحيلهم عن صفوف الأهلي، خصوصًا مع تراجع مستواه وخروجه من التشكيل الأساسي للفريق في ماتشات كتير، وإدارة الأهلي أخيرًا قررت إن ده وقت الرحيل…
محمد مجدي قفشة من وقت ما ظهر بقوة مع نادي إنبي وهو كان هدف أساسي لقطبي الكرة المصرية الأهلي والزمالك، والمفاوضات مع الفريقين كانت قوية وكان أكيد مصيره مع واحد منهم…
قفشة نفسه في الفترة دي مكانش ممانع إنه يكون موجود في صفوف الأهلي أو الزمالك، وهدفه الوحيد كان إنه يلعب لفريق من القطبين ويكون ضمن مجموعة بتدور على البطولات…
وقبل ما الأهلي أو الزمالك يقدروا يحسموا الصفقة، ظهر الطرف التالت اللي حط نفسه قطب جديد للكرة المصرية من أول يوم ليه، وهو نادي بيراميدز واللي فض الاشتباك وخطف قفشة…
موسم واحد قضاه قفشة في صفوف بيراميدز، وبمجرد ما اتعاقد الفريق مع عبد الله السعيد واتأكد إنه ملوش مكان في التشكيل الأساسي، جاله عرض من النادي الأهلي ووافق عليه من غير تردد…
الحقيقة إنه حقق حاجات كتير مع الأهلي، وخد لقب دوري وكأس، واتنين سوبر محلي، واتنين أبطال إفريقيا، واتنين سوبر إفريقي، وهتفضل أهم إنجازاته مع الأهلي جول الفوز قدام الزمالك في نهائي القرن في دوري أبطال إفريقيا والقاضية ممكن…
قفشة استفاد بشكل كبير جدًا من وجوده مع الأهلي على مدار 3 سنين، سواء بعدد البطولات اللي فاز بيها، أو باسمه اللي لمع في عالم كرة القدم، وإنه كان لفترة كبيرة ركيزة أساسية فى المنتخب الوطني، ده غير طبعًا الاستفادة المادية…
مؤخرًا علاقة قفشة بالأهلي مبقتش زي الأول، وعلاقته بالجماهير مش في أحسن حال، خصوصًا إن مستواه اتراجع، وبقى بعيد عن المشاركة بشكل أساسي، يعني مثلًا في الموسم ده لعب 8 ماتشات بس ومش كلهم بشكل أساسي، وما سجلش ولا هدف وصنع 3 كلهم في الدوري المصري…
بعد تكهنات كتير على مدار سنتين إن قفشة هيمشي، خرجت تقارير تأكد أخيرًا إنه فعلا ماشي الفترة دي، بعد ما وافقت إدارة الأهلي على عرض قوي جاي من الباطن السعودي لاستعارته…
عرض الباطن على المستوى المادي كويس جدًا، خصوصًا إنهم هيدفعوا للأهلي 750 ألف دولار يعني حوالي 18 مليون جنيه مصري، مقابل إنه ينضم للفريق معار لمدة 6 شهور بس لنهاية الموسم…
الباطن السعودي محتاج قفشة علشان ينقذ موقفه لأنه في آخر ترتيب الدوري السعودي، وقفشة محتاج تجربة جديدة علشان يرجع مستواه ويرجع للطريق الصحيح، فهل فعلا التجربة دي هتكون هي الحل لتراجع مستواه؟
