رغم خسارة المنتخب المغربي في نص نهائي كأس العالم قدام المنتخب الفرنسي، إلا أن اللي حققه أسود الأطلسي محدش يقدر ينكره، والأداء اللي قدموه بيأكد إنهم بالفعل منتخب من الكبار…
لاعيبة المغرب كانوا رجالة من أول دقيقة، وقدموا مباريات غير عادية ونتايجهم في البطولة كانت نتايج تاريخية، لكن كل ده كان وراه مدرب عبقري ومفيش حاجة سابها للصدفة، المدرب ده هو وليد الركراكي…
المنتخب المغربي فقد فرصته في المنافسة على لقب كأس العالم، لكنه خرج من البطولة من الباب الكبير جدًا، ولسه عنده فرصة إنه ينافس على إنجاز تاريخي أخير قبل ما تنتهي الرحلة…
المغرب وصلت لنص نهائي كأس العالم كأول منتخب عربي وإفريقي يحقق الإنجاز ده، وكان عندنا أمل إنهم يقدروا يكونوا في نهائي المونديال، لكن الحظ ما خدمهمش وفرنسا قدرت تحط رجليها في النهائي…
لسه المغاربة عندهم فرصة يكملوا كتابة التاريخ في المونديال اللي عمره ما هيتنسي بالنسبة للعرب كلهم، ويقدروا يحققوا المركز التالت لو فازوا على كرواتيا في الماتش اللي جاي، وده برضه كأول منتخب عربي وإفريقي يحقق ده…
كل اللي عملوه المغاربة ده، في واحد ليه دور كبير جدًا فيه، وهو المدير الفني الوطني وليد الركراكي، واللي اتولى المهمة في وقت صعب جدًا، وقبل شهرين بس من البطولة…
الركراكي كان لاعب مش مشهور أوي لكنه لعب لأندية كتير جدًا في فرنسا وأبرزهم تولوز وديجون وأجاكسيو، غير إنه لعب لنادى ريسينج سانتاندر الإسباني، وحقق مع أجاكسيو دوري الدرجة التانية الفرنسي سنة 2002…
ومع المنتخب المغربي الركراكي اللي كان بيلعب في مركز الدفاع، شارك في 45 مباراة وكان أبرز إنجازاته الوصول لنهائي أمم إفريقيا 2004، وعلى المستوى الفردي فاز بلقب أفضل مدافع مغربي في 2007…
وبعد الاعتزال ودخول عالم التدريب، اتعين مدرب مساعد لمنتخب المغرب سنة 2012، لكنه فضل بسرعة إنه يتولى مهمة المدير الفني والرجل الأول، وده حصل مع نادي الفتح الرباطي المغربي، وخد معاه جايزة أفضل مدرب محلي…
الركراكي ساب المغرب لفترة وراح الدوري القطري مع نادي الدحيل، وقاده فعلًا للفوز بالدوري، قبل ما يرجع تاني لبلاده ويتولى تدريب نادي الوداد المغربي…
مع الوداد الركراكي أبدع وتألق وفاز بالدوري المحلي، ونجح كمان إنه يتوج بدوري أبطال إفريقيا على حساب الأهلي اللي كان مكسر الدنيا وقتها، ومع الجنوب إفريقي بيتسو موسيماني كان فريق لا يقهر…
الركراكي مدرب شاب، وحريص إنه يواكب كل جديد في عالم التدريب، ومعاه رخص تدريبية من أعلى المستويات والدرجات، وبيتعلم طول الوقت، علشان كده اللي عمله المغرب ده مكانش وليد الصدفة أو ضربة حظ، ده كان نتاج شغل كبير، وأكيد اللي جاي هيكون أفضل بكتير لأسود الأطلسي.
