طول الفترة اللي فاتت مفيش حد قدر يحل أزمة الحجز على أرصدة الزمالك ويخلي ممدوح عباس يتنازل عن القضايا اللي رافضها على النادي بسبب خلافاته مع مرتضى منصور.
لكن تخيل أن أخيرا خلاص بقى في مبادرة للصلح بيقودها مسئولين كبار للدولة.. إيه حكاية الصلح؟ وإيه شرط ممدوح عباس الوحيد ة؟ وإزاي هيقدم الدعم المالي للزمالك؟.. تفاصيل كتيرة نكشفها في الفيديو ده.
مفيش كلام داخل نادي الزمالك إلا عن الأزمة المالية الكبيرة اللي بيعيشها النادي في الوقت الحالي بسبب الحجز على أرصدة النادي بحكم من من المحكمة لصالح ممدوح عباس اللي له مديونية تزيد عن 50 مليون جنيه على القلعة البيضاء.. الأزمة دي اللي مخلية كل الناس تعيش في قلق جوه نادي الزمالك ياترى هيقبضوا من فين اللاعبية والموظفين، خاصة أن بعض اللاعبية في المسابقات المختلفة بدأت تمشي من النادي أو تقدم شكاوى.
الناس اللي دخلت كوسطاء لمحاولة الصلح بين مرتضى منصور وممدوح عباس زي الزملكاوي محمد الأتربي رئيس بنك مصر وطارق الجنايني رئيس اتحاد الكرة الأسبق انتهت كلها بالفشل بسبب تمسك كل طرف بشروط معينة للصلح.
لكن الجديد أن فيه أخبار عن مفاوضات للصلح بيجريها مسئولين كبار في الدولة عشان يكون في حل لأزمة الحجز على أرصدة نادي الزمالك في البنوك.
المستشار مرتضى منصور رئيس النادى قال إن ممدوح عباس وافق بالفعل على التنازل عن قضية الحجز على أرصدة النادى فى البنوك وأنه يسيب المديونية اللي له على الزمالك ولكن بشرط وحيد في مفاوضاته اللي بيجريها مسئولين كبار في البلد عشان يوصلوا لحل للأزمة المالية.
مرتضى منصور قال إن الشرط الوحيد اللي ممدوح عباس متمسك بيه للصلح هو أنه يمشي وهو مجلس الإدارة الحالي ويتقدموا باستقالهم ويسيبوا الزمالك نهائيًا وفي الحالة دي هيتنازل كل القضايا اللي رفعها على النادي بعد رحيل مجلس الإدارة عشان يحس أنه انتصر عليه في النهاية.
مش بس كده لكن ممدوح عباس عرض على المسئولين اللي بيتفاوضوا معاه على الصلح أنه كمان هيقدم الدعم المالي للنادي بعد رحيل مجلس الإدارة الحالي، وبشرط تاني أن ابنه أيمن يكون رئيس النادي ومعه المجموعة اللي بيدعموه زى هانى العتال وعبد الله جورج سعد.
مرتضى منصور قال في تصريحاته اللي كانت عبر قناة الزمالك، إن المسئولين الكبار فى البلد كلموه وقالوا له لو عندك أزمة مع مرتضى الحجز على أرصدته هو، وبلاش تدخل النادي في القصة دي، لكن ممدوح عباس عايز يبقى أقوى من الجمعية العمومية لنادي الزمالك، وده مش ممكن يحصل ولا يمكن نسيب النادي يبقى ملكية خاصة لممدوح عباس ويجبر نفسه وابنه على إرادة الجمعية العمومية وكل الزملكاوية.
