حلم الزمالك يزداد..فيفا يعلن تفاصيل وموعد انطلاق النسخة الجديدة من كأس العالم للأندية بالنظام الجديد
أعلن الاتحاد الدولي لكرة القدم إن بطولة كأس العالم للأندية في نسختها الحالية هتتلعب في المغرب، وده طبعًا بيفتح الباب لمشاركة النادي الأهلي باعتباره وصيف دوري أبطال إفريقيا السنة اللي فاتت…
مشاركة الأهلي مكانتش الحاجة الوحيدة المفاجأة في إعلان فيفا، لأ ده رئيس فيفا أعلن مفاجأة جديدة هتفرح جماهير الزمالك، لأن خلاص الفارس الأبيض بقى عنده فرصة يشارك في المونديال….
بطولة كأس العالم للأندية بتعتبر واحدة من البطولات الحديثة في عالم كرة القدم، وعمرها ببساطة 22 سنة بس، لأن أول نسخة منها اتلعبت سنة 2000…
البطولة باختصار بتجمع بين أبطال البطولات القارية اللي تخص الاتحادات القارية الأعضاء في الاتحاد الدولي لكرة القدم، وبيشارك فيها بطل واحد من كل اتحاد قاري…
أول فريق في التاريخ كسب كأس العالم للأندية كان نادي كورنثيانز البرازيلي، والبطولة اتلعبت 18 مرة، واتلغت لمدة 4 سنين من 2001 لحد ما رجعت تاني في 2005…
الأندية الإسبانية هي الأكثر تتويجًا ببطولة كأس العالم للأندية، وتحديدًا نادي ريال مدريد صاحب الـ4 ألقاب، ونادي برشلونة صاحب الـ3 ألقاب…
بخلاف الأندية الأوروبية فاز بالبطولة أندية من أمريكا الجنوبية وتحديدًا البرازيل 3 مرات، وهما أندية كورنثيانز، وإنترناسيونال، ونادي ساو باولو، لكن مفيش ولا فريق إفريقي قدر يحقق ده…أفضل مركز للأفارقة في البطولة كان تتويج الرجاء المغربي بوصافة نسخة 2013، وعلى المستوى العربي ده اتكرر تاني من العين الإماراتي في نسخة 2018…
نظام البطولة حاليًا هو مشاركة 7 أندية هما أبطال الاتحادات القارية، يعني بطل دوري أبطال أوروبا، وبطل أبطال إفريقيا، وبطل كوبا ليبرتادوريس، وبطل أبطال آسيا، بطل أوقيانوسيا، بطل الكونكاكاف، طبعا معاهم بطل الدوري في البلد المستضيف للبطولة…
فيفا من فترة كبيرة طرح فكرة لزيادة عدد الأندية المشاركة في مونديال الأندية، علشان تطوير المنافسة، ومنح الفرصة لأندية تانية تشارك، خصوصًا إن لمدة سنين بنشوف نفس الفرق بتشارك مرة واتنين وتلاتة…
وأخيرًا مشروع فيفا بخصوص مونديال الأندية خرج للنور، وأعلنه رئيس الاتحاد الدولي جياني إنفانتينو، وقال إن البطولة بشكلها الجديد هتبدأ من سنة 2025…
كأس العالم للأندية هيكون على نفس نظام مونديال المنتخبات الحالي، يعني بمشاركة 32 فريق من مختلف دول العالم، يبدأ بدور مجموعات ويصعد أول وتاني من كل مجموعة، وبعد ثمن نهائي، وربع نهائي، ونص نهائي، وصولًا للمباراة النهائية…
البطولة بالشكل ده هتتيح فرصة أكبر لعدد كبير جدًا من الأندية إنه يشارك، لكن في نفس الوقت رئيس الفيفا ما شرحش طريقة الترشح للبطولة بشكلها الجديد…
يعني ممكن يتم اختيار أبطال البطولات القارية للمشاركة بشكل مباشر، وتكون في تصفيات لاختيار الأندية اللي هتكمل المجموعات، أو ممكن تتلعب تصفيات كاملة من البداية خاصة بالمشاركة في المونديال، لكن كل ده مجرد توقعات وفي انتظار الإعلان الرسمي عن تفاصيل أكتر بخصوص البطولة.
