نادي الزمالك مر بأزمة كبيرة جدًا على مدار الموسم اللي فات بعد ما تم منع الفريق من قيد اللاعبين لمدة موسم كامل بسبب أزمة مالية بخصوص مستحقات متأخرة…
الأزمة اللي مر بيها الزمالك خلت الفريق عاش ظروف صعبة جدًا، وأكتر من لاعب وقع معاهم الزمالك مشيو لأنهم مش هينفع يتقيدوا، ده غير إن الفريق كمل الموسم اللي فات كله بالناشئين، ويا دوب مشكلة الزمالك بتتحل، لقى نفسه داخل على إيقاف جديد والمرة دي لفترة أطول…
الاتحاد الدولي لكرة القدم، ديمًا بيكون حرص على إنه يفض النزاعات بين الأندية وبعضها أو بين اللاعبين وأنديتهم أو أندية لعبوا فيها قبل كده وسابوها، علشان كل واحد ليه حق يقدر ياخده…
وده اللي حصل في الفترة اللي فاتت مع نادي الزمالك، اللي عانى خلال الموسم اللي فات من إيقاف القيد لفترتين انتقالات، يعني محروم يجيب لاعيبة في بداية الموسم في الصيف، وكمان محروم من التدعيم في انتقالات الشتاء في نص الموسم…
العقوبة دي أثرت على الزمالك جدًا وعلى أداء اللاعبين، والفارس الأبيض اضطر يكمل الموسم بالناشئين، وطبعًا ودع بطولة إفريقيا بدري من دور المجموعات، ورغم كده قد يفوز بالدورى والكأس على المستوى المحلي…
أزمة الزمالك انتهت مؤخرًا بعد انتهاء العقوبة بنهاية الموسم اللي فات، ومع بداية الموسم الحالي الزمالك عمل أكتر من صفقة علشان يدعم صفوف الفريق، لكن مع بداية مش الأفضل في الموسم، لسه محتاج تدعيمات في يناير الحالي…
الزمالك اتصدم بخطاب من الفيفا بخصوص شكوى متقدمة بطلها هو التونسي سيف الدين الجزيري مهاجم الفارس الأبيض، الشكوى من فريقين تونسيين هما اتحاد بن قردان، والإفريقي…
الفريقين قدموا شكوى للفيفا بخصوص حقوق الرعاية من صفقة انتقال الجزيري لنادي الزمالك من المقاولون العرب، والزمالك مطالب إنه يدفع مبلغ مالي للفريقين خلال الفترة الحالية…
شكوى الفريقين متقدمة للفيفا من الصيف اللى فات وقت إتمام صفقة انتقال الجزيري للزمالك بشكل نهائي، النادي الإفريقي التونسي ليه 838 ألف جنيه نصيبه من حق رعاية اللاعب والمفروض يتم التسديد خلال 45 يوم بس…
الزمالك اتورط في حاجة مشابهة الموسم اللي فات لما وقع لاعبه الشاب حسام أشرف عقوب مع أكاديمية في الكاميرون علشان تسوقه، قبل ما يرجع ويمضي للزمالك، وقتها الفارس الأبيض اتوقف فترتين…
التقارير بتأكد إن المرة دي الزمالك لو ما دفعش المبالغ المطلوبة خلال المهلة المحددة، هيتم إيقاف قيد النادي مش بس لفترتين، لأ المرة دي لـ3 فترات…
باختصار الزمالك لازم يدفع المطلوب منه للأندية التونسية، أو هيكون محروم من الصفقات على مدار الموسم اللي جاي كله 2024 في فترتين الصيف والشتاء، وهيتحرم كمان من انتقالات الصيف في موسم 2025.
