دعم بصفقات قوية والتخلص من التفاحات الفاسدة .. انتقالات تبادلية بين الأهلى وأندية الدوري

الميركاتو المصري مشتعل من قبل حتى موسم (2021/2022) ما ينتهي، وخصوصًا في النادي الأهلي واللي أصبح قاب قوسين أو أدنى من خسارة الدوري المصري للمرة التانية على التوالي في رقم سلبي غايب من حوالي 19 سنة.

الأهلي بكل تأكيد هيدخل سوق الانتقالات بكل قوته عشان يدعم صفوف بعد خسارة الدوري للموسم التاني ومن قبله خسارة بطولة إفريقيا، ولكن الأهلي مش هيدخل الميركاتو زي كل مرة يضخ أموال ضخمه ولكن هيحاول يستخدم “إستراتيجية” جديدة في إبرام الصفقات، تعالو نشوف إيه خطة الأهلي عشان يدعم الفريق؟

إدارة الأهلي هتحاول إنها تشتغل على خطين متوازيين في خطة صفقاتها الصيف الجاي، وهي إنها تدخل اللاعبين الزائدين عن الحاجة في صفقات تبادلية للتعاقد مع اللاعبين اللي هيخدموا مصالح الفريق، ودا هيقلل المقابل المادي الكبير اللي بيتم دفعه عشان ضم الصفقات دي وكمان هيقدر النادي التخلص من اللاعبين الزائدين عن حاجته الفنية.

أول صفقتين الأهلي بيركز عليهم في الانتقالات الحالية هما ثنائي سيراميكا كليوباترا، شادي حسين ومصطفى سعد “ميسي” واللي شايف فيهم مسؤولو القلعة الحمراء إنهم هيكونوا تدعيم كبير لخط الهجوم وعندهم القدرة على رفع كواليتي الفريق هجوميًا، وبتحاول إدارة الأهلي إدخال لعيبة زائدة عن الحاجة في الصفقتين وتحديدًا، صلاح محسن وحسام حسن، واللي سبق وتألقوا مع أحمد سامي قبل كدا في سموحة وهو اللي بيحاول الأهلي استغلاله.

الصفقة التبادلية الأضخم اللي هيكون متوقع حدوثها الانتقالات الجاية هتكون بين الأهلي وبيراميدز مع عودة العلاقات بينهم، والأهلي حاطط عينه على 3 لعيبة من بيراميدز وهيحاول بشتى الطرق التعاقد معاهم أو ع الأقل إتنين منهم.

إبراهيم عادل يفضل الهدف الأساسي للأهلي الموسم دا واللي مستعد يعمل كل حاجة عشان يتعاقد معاه، ومعاه كمان أسامة جلال ومحمد حمدي لتدعيم خط الدفاع، ولكن عشان الأهلي يقدر يتعاقد معاهم لازم هيغري بيراميدز بصفقات تبادلية عشان يوافقوا على التخلي عن إتنين لعيبة على الأقل.

الصفقة هتكلف الأهلي مبالغ مش قليلة بكل تأكيد لكن هيحاول يقللها من خلال إدخال بعض لعيبته جزء من الصفقات دي وعلى رأسهم هيجي طاهر محمد وكهربا وكمان رامي ربيعة، ولكن الاختيار الأول والأخير هيكون عند إدارة بيراميدز لاختيار الأسماء دي.

من إنبي، الأهلي بيتابع مصطفى شلبي وفي فاركو فيه محمد صبحي، تركيز كبير مع الإتنين دول وتحرك مكثف من الأهلي عشان يوصل لاتفاق مع الناديين ويضم الإتنين لعيبة دول واللي لو دخل فيهم لعيبة هيكون من اللاعبين الناشئين على سبيل الإعارة خصوصًا إن الناديين عايزين يستفيدوا أكبر استفادة مادية من الصفقتين.

أخيرًا، استراتيجية الأهلي اللي بيتبعها دلوقتي هو توفير أكبر قدر من الفلوس عشان يتمم التعاقد مع إتنين لعيبة أجانب على الأقل الصيف القادم، خصوصًا إن بقا فيه قناعة داخل النادي إن الصفقات الأجنية هي اللي ليها قدرة على صنع الفارق ولينا في علي معلول وأليو ديانج عبرة.

مما سبق نقدر نتأكد إن الأهلي بيحاول يستغل لعيبته اللي بقا شايف مفيش فايدة فنية هتعود منهم في الصفقات التبادلية لتسهيل التعاقد مع اللاعبين اللي موجودين على لائحة رغبات النادي، فهل هتنجح الخطة دي؟