مستقبل المدير الفني البرتغالي للنادي الأهلي، ريكاردو سواريش بقا على كف عفريت بعد المستوى الباهت اللي قدمه مع الفريق خلال الشهرين الأخيرين بعد ما تولى المهمة دي، والأصوات تعالت داخل جدران القلعة الحمراء إن الأهلي محتاج مدرب أقوى من كدا وأكثر خبرة وتجربة.
وتزامن مع ضبابية مستقبل سواريش مع الأهلي وبداية البحث عن مدير فني جديد، رسالة ضياء السيد على تويتر للمدير الفني السابق لمنتخب مصر، كارلوس كيروش بيرحب بيه في مصر، عشان تنتشر الأخبار بسرعة البرق عن إن كيروش قد يكون هو المدير الفني القادم للأهلي.
وبعيدًا عن حدوث دا أو لا، بس هو كيروش أصلًا هو أفضل خيار لإدارة الأهلي عشان تعويض سواريش؟
لما نيجي نقيم تجربة كيروش السريعة مع منتخب مصر هنلاقي عنده مميزات مهمة محتاجة الأهلي، أولها وأهمها شخصيته الصارمة جدًا في التعامل سواء مع الإدارات أو اللاعبين وهو اللي بيوفر انضباط كبير جدًا في الفريق والتزام ضخم من كل العناصر بتعليماته وإنها تمشي على الخط المرسوم صف واحد، لا يشذ حد عنه.
الأهلي محتاج حالة الانضباط الكاملة دي في الفريق، وإن يتعاقد مع مدير فني بشخصية قوية يقدر يفرض كلمته على أوضة اللبس واللاعبين ويرجع الانضباط اللي كان دايمًا المارد الأحمر مشهور بيه، كمان يكون صاحب شخصية قوية حتى في التعامل مع الإدارة ويكون قادر على تحمل الضغوطات الضخمة واللي اشتكى منها فايلر وبعده موسيماني لكن البرتغالي المخضرم قدر يتحملها ويعدي منها بسهولة مع المنتخب.
كمان كيروش أظهر إيجابية كبيرة أوي مع منتخب مصر وهي قدرته على تطوير اللعيبة فرديًا، رغم ضيق مدة وجود اللعيبة تحت إيده في معسكرات منتخب مصر لكن شوفنا تطور كبير جدًا في مستواهم مع المنتخب عن المستوى اللي وصلوا عليه من الأندية بتاعتهم.
محمد عبد المنعم، عمر كمال عبد الواحد وياسر إبراهيم ومحمد أبو جبل وحتى أحمد فتوح كلهم أسماء كيروش كان ليه بصمة كبيرة أوي في مسيرتهم وتطورهم على المستوى الفني بشكل ملحوظ سواء في بطولة أفريقيا أو تصفيات كاس العالم، ودا اللي الأهلي محتاجه جدًا إن يجي مدرب يقدر يطور لعيبته بشكل كبير زي ما فايلر عمل قبل كدا وبقا ملحوظ نجاحه الكبير.
كيروش كوتش كبير أوي على الخط في الماتشات وبيقدر يتدخل ويغير الخطط بشكل مستمر وعمل دا كتير مع منتخب مصر، عنده مرونة تكتيكية محتاجها الأهلي جدًا وكانت سر نجاح موسيماني.
لكن لأن الحلو ما يكملش، مع كل الإيجابيات دي فكيروش عنده عيبين، الأول هو عامل السن واللي ممكن منعتبروش عيب أوي بعد اللي شوفناه منه مع المنتخب ومن فيريرا مع الزمالك لكنه يبقى محل تخوف من البعض، لكن العيب الأبرز هو اللي يقلق فعلًا.
كيروش بعيد عن تدريب الأندية من فترة طويلة جدًا وصلت لحوالي 6 سنين مثلًا، ودا رقم كبير والأكيد إن شغل المنتخبات غير شغل الأندية تمامًا اللي بيحتاج شغل متواصل يوميًا ولعب ماتشات كتير جدًا ودراسة خصوم مختلفة عكس المنتخبات اللي شغلها أقل كتير أوي، ودي نقطة تقلق وتخوف.
بشكل إجمالي، كيروش كشخصية ومميزات فنية يمتلك كل اللي الأهلي محتاجه عشان يرجع تاني للواجهة لكن خطر الابتعاد عن تدريب الأندية هو النقطة اللي تخوف وتقلق الكل منه، لكن بالتأكيد هيكون مكسب كبير أوي للأهلي.
