الأهلي لسة بيدور على تدعيمات قوية لمحو الإخفاق الضخم اللي اتحقق الموسم الحالي، بعدما خسر الفريق رسميًا بطولة الدوري المصري الممتاز للموسم التاني على التوالي، في سابقة لم تحدث من 19 سنة تقريبًا.
سقوط مدوى خلى فيه حالة طوارئ ضخمة داخل صفوف النادي الأهلي لإعادة بناء الفريق مرة تانية وعمل ثورة حقيقية على مستوى الصفقات، وتحديدًا الأجانب اللي الأهلي بدأ يتأكد إنها اللي بتعمل الفارق الكبير لنادي عن التاني.
وفي الساعات اللي فاتت ظهر اسم جديد مرشح لتدعيم هجوم النادي الأهلي الموسم اللي جاي وهو النيجيري بيتر أولاينكا، واللي بيلعب حاليًا لنادي سالفيا براج التشيكي، واللي بيتم وصفه دايمًا بإنه جوكر هجومي بيقدر يلعب في أكثر من مركز، لكنها أبدًا مش هتكون صفقة سهلة خالص للنادي الأهلي.
بيتر أولاينكا لاعب نيجيري من مواليد عام 1995، أي يملك من العمر 26 سنة، بيشغل مركز الجناح الأيسر بشكل أساسي لكن بيقدر يلعب كمهاجم كمان وأوقات بيتم استخدامه كجناح أيمن لو احتاج الأمر، وهو اللي خلاه يتم وصفه بالجوكر الهجومي.
أولاينكا بدأ يذيع صيته في الملاعب الأوروبية بداية من عام 2017، وتحديدًا لما انتقل لجينت البلجيكي، لكنه خرج إعارة لنادي واريجم البلجيكي لمدة موسم، لكنه مقدرش يتأقلم مع الدوري البلجيكي عشان يتباع بعد موسم إعارة فقط.
انطلاق أولاينكا الحقيقية كانت في الدوري التشيكي مع سلافيا براج بعد ما انضم للفريق في عام 2018، وقدر من بعدها يحجز مكان أساسي مع الفريق سواء في البطولات المحلية أو القارية.
أولاينكا شارك مع سلافيا براج على مدار 4 مواسم في 151 مباراة بمختلف البطولات، ساهم فيهم بـ53 هدف، بعد ما سجل 34 هدف وصنع 19 آخرين، عشان يبقى من أهم أسلحة الفريق الهجومية وبيتم الاعتماد عليه بشكل أساسي.
الموسم الجديد، أولاينكا بدأه بشكل ولا أجمل بعد ما قدر سجل هدفين ويصنع هدف في أول 4 مباريات بين الدوري التشيكي وتصفيات التأهل لدوري المؤتمر الأوروبي، عشان يثبت مرة تانية مكانته في خط هجوم الفريق.
ليه بقا بنقول إن الصفقة صعبة جدًا على الأهلي، لأن اللاعب صاحب الـ26 سنة، قيمته السوقية حوالي 6 مليون يورو ومع اعتماد الفريق بشكل كامل عليه زي ما وضحنا وبداية الموسم الاوروبي بالفعل مش هيتم بيعه إلا لو فيه عرض كان أكبر من كدا، وهو اللي الأهلي ميقدرش يقدمه حاليًا.
لكن الأهلي بيراهن على إقناع الجناح النيجيري بإنه ينتقل ليه خصوصًا مع تبقي موسم وحيد ليه مع النادي التشيكي ودا اللي ممكن يخليه يوافق يبيعه قبل موسم واحد بس عشان ميخسروش مجانًا بعد كدا، فهل هيقدر الأهلي يقدر أولاينكا ولا لا؟
