يبدوا أن أزمة البرنامج اللي كان بيقدمه المستشار مرتضى منصور رئيس نادي الزمالك على قناة النادي لسه عامل أزمات كتيرة.. فبعد تقديم العديد من الأشخاص شكاوي بسبب حلقات البرنامج واللي خلت المجلس الأعلى للإعلام يوقفه ويفتح تحقيق عاجل.. ظهرت أخبار جديدة عن تقديم شكوى من النادي الأهلي ضد نفس البرنامج.
إيه حكاية الشكوى دي وليه الأهلي قدمها دلوقتي؟ وإيه الكلام اللي اتقال أغضب محمود الخطيب رئيس القلعة الحمراء؟.. تفاصيل كتيرة نكشفها في الفيديو ده.
في تطور جديد لأزمة الحلقات اللي كان بيقدمها المستشار مرتضى منصور في برنامج زملكاوي اللي على قناة النادي.. تقدم النادي الأهلي بشكوى إلى المجلس الأعلى للإعلام ضد قناة الزمالك وتجاوزاتها المستمرة ضد القلعة الحمراء ومجلس الإدارة برئاسة الكابتن محمود الخطيب رئيس النادي الأهلي.
الشكوى اللي قدمها الأهلي خصت بالتحديد برنامج «زملكاوي» اللي كان بيقدمه المستشار مرتضى منصور رئيس النادي، واللي وجه في حلقاته اتهامات للأهلي ورئيسه محمود الخطيب وأعضاء مجلس إدارته قال الأهلي في شكوته أنها اتهامات كاذبة وباطلة، ولا أساس لها من الصحة.. مش بس كده لكن الأهلي قال إن خلال البرنامج ده بيتم أخذ بعض الفيديوهات في البرنامج المنسوبة لأحد الأشخاص اللي بيقول إنه أحد الشيوخ ورجال الدين وهو بيقول كلام كله كاذب وغير موجود على أرض الواقعة
الأهلي قال كمان في الشكوى اللي قدمها أن مقدم البرنامج وهو المستشار مرتضى منصور والضيوف اللي بيكونوا قاعدين معاه بيتعمدوا تشويه صورة النادي الأهلي ورموزه التاريخين اللي الناس بتحبهم من خلال أكاذيب ومعلومات مش صحيحة وده اللي عمل حالة غضب كبيرة بين الملايين من عشاق القلعة الحمراء عشان كده كان لازم الأهلي يتحرك ويقدم شكوى ضد إدارة النادي.
كمان مجلس إدارة النادي الأهلي برئاسة الكابتن محمود الخطيب قال في الشكوى اللي قدمها للمجلس الأعلى للإعلام أن البرنامج ده بينذر بأن فيه حالة احتقان كبيرة بتحصل في الشارع الرياضي بين جمهور أكبر ناديين في مصر.. الأهلي تسأل في الشكوى اللي قدمها أنه مش عارف ليه المجلس الأعلى للإعلام ورئيسه الكاتب الصحفي كرم جبر مش بيتحملوا مسؤولياتهم ويقومون بتطبيق اللوائح والقوانين حوالين اللي بيحصل في قناة الزمالك والاتهامات والسباب لأشخاص كتيرة.. مش بس كده لكنه الأهلي أحرج المجلس الأعلى للإعلام وقال في الشكوى إنه مش عارف كمان إيه الهدف من أنه لا يتم اتخاذ أي موقف تجاه قناة الزمالك في الوقت اللي بعض البرامج فيها بتعمل على أنها تثير الفتن بين الجماهير وتسيء إلى رموز الأهلي؟.
الأهلي قال في الشكوى اللي قدمها أنه طالب في مرات كتير باتخاذ الإجراءات القانونية لإيقاف التجاوزات اللي بتحصل في قناة الزمالك وتطاولها المتكرر لكن الأمر مستمر بدون ما يكون فيه أي حساب.
مصدر داخل النادي الأهلي قال إن الإساءات اللي بتحصل كل شوية لرموز الأهلي أغضبت محمود الخطيب لكنه مااتحركش قبل كده لأنه كان في رحلة علاج وبمجرد رجوعه وزي عادة النادي الأهلي ومجلس لازم يعمل اجتماع وياخدوا قرار جماعي.. بعد الاجتماع كان القرار النهائي.
المستشار مرتضى منصور كان دخل في أزمة كبيرة الأيام اللي فاتت بعد الحلقتين اللي ظهر فيهم خلال برنامج زملكاوي على قناة النادي وهاجم ناس كتير وده اللي خلى المجلس الأعلى للإعلام يفتح تحقيق عاجل في التجاوزات دي ويشوف إذا كانت مخالفة للأكواد الإعلامية ولا لاء.. خاصة مع تقديم ناس كتيرة شكاوى في رئيس نادي الزمالك.
وعلى الرغم من أن مرتضى منصور طلع ورد على الأخبار دي وقال إنه متحمل المسئولية وقناة الزمالك ملهاش دخل وإنه كان بيهاجم أعداء مصر بس وتجاوزته كانت ضد الخونة.. عشان كده حتى مش اتكلم في الرياضة ولكنه صوت الشعب وبيدفع عن البلد ضد الخونة؛ إلا أن وقتها ظهرت أخبار عن العقوبات المتوقعة عليه منها منعه من الظهور الإعلامي وإغلاق قناة النادي لكن رئيس الزمالك قال إن محدش يقدر يمنعني واللي
بيقول ميخافش.
