عودة مرتضي منصور.. أخوض معركة الحق والعدل .. تعرف علي الحلقة الجديدة التي ستشهد عودة المستشار
مرتضى منصور راجع للظهور من تاني.. ده الخبر الجديد اللي ناس كتير بتداوله في الوقت الحالي، فبعد أزمة الحلقات اللي عملها في برنامجه اللي بيقدمه على قناة الزمالك وإعلان المجلس الأعلي للإعلام فتح تحقيق عاجل؛ إلا أن رئيس الزمالك راجع تاني وهيقدم البرنامج من جديد.
إيه حكاية الرجوع وإزاي مش موقوف وإمتى هتكون الحلقة الجديدة؟ وليه ده بيجي في الوقت اللي بيمشي فيه خالد الغندور؟.. تفاصيل كتيرة نكشفها في الفيديو ده.
على مدار الأيام اللي فاتت انتشرت أخبار كتيرة عن أنه تم منع المستشار مرتضى منصور رئيس نادي الزمالك من الظهور الإعلامي بعد أزمة الحلقتين اللي عملهم في البرنامج الجديد اللي بيقدمه على القناة واللي تقدم فيه شكاوي كتيرة خلت المجلس الأعلى للإعلام يقرر أنه يفتح تحقيق عاجل في الحلقات دي ومخالفتها للأكواد الإعلامية المعروفة.
لكن المستشار مرتضى منصور قرر أنه يتحدى الجميع ويعلن أنه هيطلع في البرنامج وراجع تاني للظهور الإعلامي، مع إذاعة قناة الزمالك عن برومو الحلقة بتاعته في برنامج زملكاوي، لكن هيكون في موعد جديد.
طارق يحيى مقدم برنامج زملكاوى، قال عبر قناة الزمالك الفضائية، إن المستشار مرتضى منصور قال له إنه سيظهر على قناة ناديه يوم الجمعة الجاية بدلا من الخميس بسبب خوض الفريق الأول لكرة القدم مباراة قوية أمام المصري البورسعيدي فى الجولة الخامسة للدوري عشان كده هيرجعه لكن في ميعاد جديد وهو يوم الجمعة.
الكلام اللي بيقوله طارق يحيى يعتبر إثبات للي قاله مرتضى منصور في مقطع فيديو تم بثه عبر قناته على موقع “يوتيوب”، إنه مش ممنوع من الظهور على قناة الزمالك، لكنه بيخوض هو والزمالك معركة الحق والعدل وأن الهجوم عليه مش معركة شخصية ولكنه مستمر فيها حتى النهاية، وأنه بيطالب من جماهير نادي الزمالك أنهم يقفوا جنب الفريق بتاعهم.
الغريب في الأمر أن وقت رجوع المستشار مرتضى منصور هو الوقت اللي أعلن فيه الإعلامي خالد الغندور رحيله عن القناة وسط علامات استفهام كبيرة من جماهير الزمالك ومتابعيه حول قرار رحيله عن قناة الزمالك الفضائية باعتباره أهم مقدم للبرامج في القناة واللي بيملك شعبية كبيرة باعتباره قائد نادي الزمالك في السابق.
مصادر داخل نادى الزمالك كشفت عن أن خالد الغندور على الرغم أنه قدم آخر حلقة له يوم 30 نوفمبر إلا انه مش عايز يغادر قناة الزمالك الفضائية زي ما بيقول بسبب نهاية عقده كمذيع محترف ولكنه بيعمل كده عشان يضغط على مجلس الإدارة في التجديد.
كمان المصادر أكدت أن المستشار مرتضى منصور رئيس نادى الزمالك ورئيس مجلس إدارة قناة النادي الفضائية معلقش على تلميحات خالد الغندور بنهاية عقده عشان هو متأكد تماماً انه معندوش عروض تانية زي ما بيقول خاصة أنه محسوب على الزمالك وأنه مع الوقت يهقبل أنه يجدد بدون زيادة في أجره زي ما هو عايز عشان كده هيسيبه لغاية لما يوافق في النهاية.
