تشيزنى التاريخى يصعد ببولندا والعويس تألق ولكنه أضاع في الجولة الثالثة آمال السعوديين
مفيش شك إن حارس المرمى فعلا نص الفريق، وخصوصا فى الماتشات الكبيرة والبطولات المجمعة القوية اللى بيتحسم فيها مصير الفريق من ماتش أو اتنين…
وفى النسخة 22 من بطولة كأس العالم فى قطر 2022، كان لحراس المرمى الدور الأكبر فى حسم مصير المنتخبات المتأهل لثمن نهائى البطولة…
المجموعة التالتة من مجموعات كأس العالم 2022، كانت مجموعة غير عادية، ومراكز الصعود فيها ما اتحسمتش إلا مع الثوانى الأخيرة من الجولة الختامية فى المجموعات…
المجموعة دى بدأت من بدري جدًا بالمفاجآت، وطبعا كانت المفاجأة الأكبر خسارة المنتخب الأرجنتينى المرشح للبطولة قدام منتخب السعودية فى افتتاح المجموعة…
وفى الماتش ده شوفنا أول تألق لحراس المرمى وكان بطله محمد العويس حارس السعودية اللى توج بجايزة أحسن لاعب فى المباراة..
بعدها شوفنا ماتش قوى جدًا بين المكسيك وبولندا واللى انتهى بالتعادل السلبى، فى الماتش اللى اتصدى فيه أوتشوا حارس المكسيكى لضربة جزاء من روبرت ليفاندوفسكى…
الماتش التالت كان بين منتخب بولندا والسعودية، وطبعا خلاص عرفنا مفيش ماتش فى المجموعة دى حارس المرمى مش هيكون البطل فيه، وقتها كان فى تصدى مهم جدا لتشيزنى حارس بولندا لركلة جزاء من سالم الدوسرى، كانت سبب مهم إنهم يفوزوا بهدفين من غير رد…
فى الماتش التالت، أوتشوا ظهر بشكل مهزوز قدام الارجنتين علشان تستقبل شباكه هدفين ويكون سبب رئيسى فى هزيمة المكسيك رغم الأداء الجيد اللى قدموه…
فى الجولة الأخيرة، المنتخب البولندى خسر بهدفين من غير رد قدام الأرجنتين صحيح، والناحية التانية المنتخب المكسيكى فاز بهدفين لهدف قدام السعودية، فى الآخر الأرجنتين وبولندا صعدوا…
الأرجنتين صعدت ببساطة علشان هى معاها أكبر عدد نقط فى صدارة المجموعة، لكن بولندا صعدت على حساب المكسيك رغم إنهم متعادلين فى النقط، وده لأن فرق الأهداف كان فى صالحهم…
فى ماتش بولندا والأرجنتين حارس مرمى بولندا تشيزنى اتصدى لتانى ضربة جزاء ليه فى المونديال، وكانت قدام العملاق ليونيل ميسى، ولو الضربة دى دخلت كان زمان المكسيك فى ثمن النهائى على حساب بولندا، أو على الأقل كانوا دخلوا معاهم فى حسابات تانية…
الناحية التانية محمد العويس حارس مرمى المنتخب السعودى استقبلت شباكه هدفين، صحيح منهم هدف صعب عليه، لكن الهدف التانى بيتحمل جزء كبير منه…
رغم تألقه فى المباراة إلا إنه أخطأ فى توقع الضربة الحرة الرائعة اللى اتسددت على مرماه واللى جه منها الهدف التانى، واللى خرج السعودية من أجواء المباراة تمامًا، علشان يكون تشيزنى سبب أساسى فى صعود منتخب بلاده رغم استقباله هدفين، ويكون العويس سبب برضه فى ضياع فرصة السعودية الذهبية فى الصعود…
تشيزنى كمان حقق رقم تاريخى كان غياب عن كأس العالم من 20 سنة، بعد ما بقى أول حارس يصد ركلتين جزاء فى مونديال واحد بعد الأمريكى براد فريدل فى مونديال 2002 فى كوريا واليابان…
