الأزمة مابتنتهيش خناقة ما بين نادى الزمالك والأهلى والسبب كهربا، بقالهم اكتر من شهر والدنيا قايمة مابينهم عليه، الزمالك وقف اللاعب من اللعب مع الأهلى لمدة شهور، بس شكل جه الدور على الأهلي أنه يرد القلم للزمالك.
تقارير بتقول أن كهربا خلاص هيلعب مع الأهلى من غير م ايدفع أي غرامة .. الكلام ده صحيح ولا لا، ده اللى ها نقوله ليكم في الفيديو ده .
خلال الساعات اللي فاتت خرجت تقارير صحفية تقول إن خلاص اللعنة اللي عملها الزمالك لكهربا مع الأهلي فكت وخلاص هيلعب معاهم، من غير دفع الغرامة المالية اللى كانت عليه، 2 مليون و600 ألف دولار يامعلم، احسبوا بقى يبقوا كام مصري.
نرجع لموضوعنا، الأستاذ إيهاب الكومى عضو اتحاد الكرة المصرية، طلع النهاردة في تصريحات صحفية، وقال انه الاتحاد بعت خطاب رسمى للفيفا بخصوص كهربا يسأل كهربا هيلعب الفترة اللى جاية ولا لا، والفيفا رد على الخطاب وقال أن العقوبة اللى كانت مفروضة على اللاعب اترفعت وخلاص كهربا يقدر يعلب من النهاردة لحد صدور قرار جديد بإيقاف اللاعب مرة أخرى حال عدم انتهاء أزمة سداده غرامة نادي الزمالك.
في النفس الوقت طلع مصدر قريب من إدارة كابتن محمود الخطيب وقال إن موقف كهربا سليم ولو عايز يعلب الماتش ضد النادى المصرى، من حقه يلعبه عادى، بس النادى الأهلى وعلشان بيحب يتعامل مع أوراق رسمية فا هوا مآخر قرار اللعب بكهربا لحد مايجى خطاب رسمى للنادى من الاتحاد الدولى لكرة القدم يؤكد حق اللاعب في القصة دى وبالتالي هيكون من حقه أنه يشارك في كأس العالم.
طيب الزمالك ومرتضى بيعملوا إيه؟
المستشار مرتضى منصور، بيجهز ملف بالورق علشان يقول لاتحاد الكرة الدولى ان كهربا لسه مادفعش الغرامة اللى عليه، وان قرار أنه يلعب مش صح، وبالتالي كهربا ها يتوقف تانى.
وفيه مصدر قريب من مرتضى منصور في الزمالك، قال إن مجلس إدارة النادى خلص من تجهيزه الملف، بتاع العقوبة الموقعة على كهربا وتم إرساله للاتحاد الدولي لكرة القدم”فيفا” والمحكمة الرياضية ، ومن المنتظر أن يتم مضاعفة العقوبة على كهربا في الأيام القليلة المقبلة.
الغريب بقى بعد كل ده، ان الإعلامي مدحت شلبى طلع من شويه وقال ان كهربا مش هيلعب مع الأهلي إلا بعد دفع الغرامة لنادى الزمالك، قولا واحدا يعنى، والكلام على لعبة بعد 11 يناير كلام مش صح.
وزاد في كلامه وقال أن اتحاد الكرة المصرى لم يجرؤ على إرسال جواب للأهلي يفيد بأحقية كهربا فى المشاركة إلا بعد أن يرسل له فيفا جواب بذلك، ومن وجهة نظرى لن يرسل فيفا أى جواب ولن يلعب كهربا.
ياترى كهربا هيقدر يلعب مع الأهلي الأيام اللى جاية ولا لا، ده اللى هنعرفه مع بعض، وهل ممكن فعلا كهربا يدفع الغرامة اللى عليه، والأهلي ممكن يساعده فيها، دى أسئلة حابين نعرف رأيكم عليها، اكتبوا في التعليقات.
